Historia e trishtë e Kristofer MekKendëllsit
Blog
Historia e trishtë e Kristofer MekKendëllsit
Kristofer MekKendëllsi është protagonisti i librit e i filmit të famshëm Në egërsinë e natyrës (Into the wild) shkruar nga Jon Krakaueri.
Kristofer MekKendëllsi ishte nxënës i shkëlqyer. Ai kishte marrë vetëm një notë jokaluese, sepse nuk kishte pranuar ta bënte detyrën e fizikës ashtu siç i thoshte mësuesi. Që në shkollë, njihej për idealizmin e tij të padiskutueshëm. I ati e keqtrajtonte fizikisht e psikologjikisht nënën e tyre, madje edhe fëmijët i rrihte me rrip, si formë disiplinuese. Me sa duket, edhe e ëma sillej keq me ta, sidomos me Kristoferin, të cilin e akuzonte se ishte arsyeja pse nuk ishte ndarë me të shoqin. Kjo bëri që ai të tërhiqej e të izolohej edhe më shumë nga shoqëria. Kristoferi zbuloi se babai kishte edhe një familje tjetër në Kaliforni dhe se nuk ishte ndarë nga gruaja e parë, edhe pasi kishte njohur nënën e tyre. Atëherë, ai vendosi të mos i fliste më të atit. Pasi u diplomua në Emory, Kristoferi u bind që titujt e diplomat nuk bënin për të dhe fondin e mbetur të kolegjit, pra, 28 000 dollarë, i dha për bamirësi. Atë e frymëzonin aventurierët, si Xhek Londoni, ndaj, para se të nisej për në Alaskë, përshkoi shkretëtirat e Perëndimit. Rrugës iu prish makina, të cilën e la ashtu siç ishte me gjithë çelësa, bashkë me shënimin: “E fiton ai që arrin ta lëvizë nga vendi”. Prej aty u nis më këmbë. Ndërroi emrin në Aleks Supertramp dhe vendosi t'ia niste nga e para, duke lënë pas gjithçka që i kishin dhënë prindërit. Në ditët e para ia doli të vriste një dre (shiko foton), po, meqenëse nuk mundi ta gatuante, u pendua dhe ua la mishin ujqërve. Edhe pse e kishte nisur mbarë, hajet nuk i mjaftuan për shumë kohë. Kur i zbuluan trupin, Kristoferit i gjetën edhe disa sende, të cilat tani ruhen si suvenire: një aparat fotografik, disa libra, ditarin, thesin e fjetjes, ku u gjend trupi dhe një pushkë. Ai e kishte shënuar rrugën e kthimit, por, kur vendosi të kthehej, lumi Teklanika kishte përmbytur gjithçka dhe djaloshi mendoi të priste sa të binte niveli. Po të kishte përvojë si alpinist, doemos që do ta dinte se lumin mund ta kalonte në mëngjes ose do të gjente shtigje të tjera aty rrotull për ta kaluar. Kristoferi vdiq nga mosushqyerja, pasi nuk ka ditur t’i ruante ushqimet siç duhej. Sipas mjekëve, farat që hante, duhet të kenë pasur myk, i cili krijon çrregullime nervore, mungesë oreksi dhe humbje peshe. Autobusin e braktisur ku ndërroi jetë Kristoferi, tani e vizitojnë shumë nga ata që, si ai, duan ta braktisin shoqërinë e të kridhen aventurave.
Burimi i informacionit, 28 Janar 2020: History Collection
Artikuj të përzgjedhur
Fama dhe qetësia nuk mund të shkojnë kurrë bashkë
Në esenë "Mbi vetminë" (nga vëllimi i parë i Eseve të tij), Montenji trajton një temë që ishte bë...
Kujdesi për trurin
Për shekuj me radhë, për të vënë në gjumë foshnjat, kemi përdorur teknika pa pasur asnjë lloj ide...
Çfarë ndodh 1 orë pasi hap një libër?
Libri, kjo shpikje e çuditshme, që i ndryshon mendjen e jetën njeriut në mënyrë djallëzore. Lexoni më posht...
10 Të famshëm me biblioteka madhështore
Meqenëse folëm para pak ditësh për bibliotekën e famshme të Lagerfeldit, vendosëm që t 'u tregojmë edh...
Po biblioteka e Karl Lagerfeldit?
Sot u nda nga jeta stilisti i famshëm Karl Lagerfeld. Lagerfeldi kohë më parë tërhoqi vëmendjen e publikut edhe me bi...
Po ti, e do apo e urren Lizën?
Nuk e mbaj mend moshën kur e kam lexuar "Lizën në botën e çudirave", por kam ende para syve çastin kur e tërhoqa...
Shkëmbimi i librave në SHBA
Në Shtetet e Bashkuara e në botë kanë filluar të vendosen nëpër rrugë kuti të vogla prej druri në...
Përse duhet ta mësojë fëmija programimin?
Programimi (kodimi) është një nga gjuhët më të përdorura në botë
Shkenca ...