Çfarë ndodh 1 orë pasi hap një libër?
Blog
Çfarë ndodh 1 orë pasi hap një libër?
Libri, kjo shpikje e çuditshme, që i ndryshon mendjen e jetën njeriut në mënyrë djallëzore. Lexoni më poshtë se si... 10 minutat e para
Nxitje e menjëhershme e sistemit. Ndjesia e prekjes, forma pamore e shkrimit dhe një lloj freskie, fillon ta çojë përdoruesin në një tjetër rrafsh. Mund të nxisë shqisën e nuhatjes: edhe përdoruesi më kokëfortë, mund të dorëzohet para "aromës së një libri të vjetër". Pasojat intelektuale fillestare mund të përfshijnë ngazëllim, që buron nga pikasja e një zëri të panjohur rrëfimtar, çoroditje përballë terminologjisë së re, rezistencë të përkohshme ndaj ideve të reja dhe përgjithësisht një veprimtari të rritur nervore.
30 minuta
Ndikimi tani shtohet dhe mund të përjetohen vegime pamore e dëgjimore. Shumica e përdoruesve tani janë ndërgjegjësuar mbi zërin, që vazhdon të flasë në kokën e tyre dhe shumë raportojnë se “shohin” përfytyrime fantastike, ndonjëherë me kthjelltësi të plotë. Përdoruesit mund edhe të përshkruajnë “shpërngulje” në një kohë dhe vend tjetër. Shumë përdorues tani ndjejnë detyrimin të ndërveprojnë fizikisht: palosje të cepave të faqeve; shkrime ose letra me ngjitëse për shënime; nënvizime ose theksime paragrafesh (nga kjo sjellje varet mbarëvajtja e librave të bibliotekave). 60 minuta
Zhytje e plotë në libër. Përdoruesi mund të përjetojë reagime akute, nga të qeshurat e pakontrollueshme e deri tek dhimbja e thellë. Disa përdorues të letërsisë artistike raportojnë një lidhje të thellë psikologjike me karaktere dhe ngjarje të librit, ndërsa “bota e vërtetë” tkurret. Përdoruesit përfshihen tërësisht dhe mund të ndalojnë befas e të shohin ngultas hapësirën. Besohet se kjo veprimtari vërteton efektet anësore, si ekspozimi ndaj fakteve dhe ideve të reja dhe rritje e hetimit të vetes si qenie njerëzore. Kjo quhet ndryshe edhe “të mësosh”.
më shumë se 60 minuta
Libri tani të përthith plotësisht dhe shkëputja prej tij shkakton acarim dhe hutim të përdoruesit. Nevoja e përdoruesit për librin në këto çaste është kaq e fortë, sa nuk e lëshon dot nga dora, madje lë pas dore nevoja të tjera bazike njerëzore, si ushqimi ose gjumi.
Orë/ ditë/ javë
Koha e saktë varet nga përdoruesi dhe libri, por po flasim për çastin kur libri përfundon. Kjo mund të shkaktojë melankoli të fortë. Në fakt, shumë përdorues e lexojnë librin edhe për herë të dytë e të tretë, duke u përpjekur të përjetojnë sërish ndjesinë e leximit të parë. Duhet vërejtur se disa përdorues raportojnë, që do të donin të ktheheshin në jetën para librit në fjalë, kur bota u dukej më pak e ndërlikuar. Paradoksalisht, këta përdorues shpesh kërkojnë vëllime edhe më sfiduese, pas një periudhe të shkurtër rimëkëmbjeje.
Vite
Ndikimi i librave ndihet ende. Shumë përdorues tani janë bërë lexues të rregullt, gjë që pasohet nga një nivel i ngritur dijesh të përgjithshme dhe mbërthehen nga cikli i gjatë i të nxënit gjatë gjithë jetës, përndritja e mëtejshme dhe kureshtja e theksuar intelektuale.
Artikuj të përzgjedhur
Historia më madhështore që është rrëfyer ndonjëherë
Sipas një anketimi të BBC-së, historia më madhështore që është rrëfyer ndonjëherë, ësht...
Biblioteka e Librave të Ndaluar
Më 10 maj të vitit 1933, nazistët vendosën të digjnin librat “kundërgjermanë”, që, sipas tyre...
Bibliotekat: Aty ku ruhet kujtesa e botës
Po qe se edhe ti, ashtu si Horhe Luis Borhesi, mendon se parajsa është një bibliotekë, atëherë bëhu gati të...
Njerëzit që lexojnë shumë, janë më të këndshëm dhe më të ndjeshëm
Njerëzit mendojnë se minjtë e librave janë vetmitarë e të mbyllur në vetvete. Mirëpo shkenca na thotë ...
Të përhumbesh pas shkronjave
Sa do të doja të mos kisha hyrë nëpër udhën ku të çon "Rruga"
Ka disa libra, që nuk i çlexon dot më, sado fort ta dëshirosh këtë. Për disa syresh e dëshiron, sepse do t'...
Një libër për t’u shoqëruar me... aromë
Çdo lexues ka zakonet e tij: dikush lexon në qetësi të plotë, dikush me muzikë, dikush vetëm para se të fle...
Rreziku i së ardhmes është se njerëzit mund të bëhen robotë
Sociologu dhe psikanalisti gjerman, Erih From, thoshte se në shekullin XIX, gjatë industrializimit, Zoti ishte shpallur i vdekur, "munges...