NËSE NUK GJEN KURRË KOHË PËR TË LEXUAR, ATËHERË PO JUSTIFIKOHESH

Nuk gjen dot kohë të lexosh nja dy faqe? Po si i dilet me gjithë ngarkesat e ditës? Ne po ju japim të paktën dy zgjidhje për të lexuar më shumë...

”Njeriu është viktimë e një mjedisi, të cilit nuk i bëhet vonë për shpirtin e tij”, shkruan Çarls Bukovski dhe fort keq nuk e ka; jetojmë duke rendur mes punës, familjes e shoqërisë, ndaj nuk na del më koha për të lexuar dhe tashmë ky është bërë një problem më se i zakonshëm. Gazetari Oliver Bërkemen u përpoq t’i përgjigjej këtij shqetësimi, duke u bazuar tek analiza dhe zgjidhja e romancierit e kritikut Tim Parks, që thotë: “Kushtet në të cilat lexojmë sot, jo vetëm që nuk janë më ato të 50 viteve më parë, por as të 30 viteve më parë. Kohën, që të lexojmë vazhdimisht e në vijimësi, duhet ta fitojmë e ta programojmë”. Po si t’ia bëjmë që ta programojmë atë? Duke krijuar një lloj rituali, duke e ndarë orarin e leximit e duke krijuar disa zakone të posaçme, për shembull, të ulemi e të lexojmë gjithmonë në të njëjtin qoshk, stol në park apo tavolinë biblioteke. “Argëtimet mund të kufizohen duke lexuar libra të shtypur ose një pajisje, që është vetëm për libra. Edhe këshilla e famshme për të mbajtur përherë me vete një libër, është e vlefshme, nëse lexuesi arrin të zhytet kokë e këmbë për një copë herë në lexim. Dhe nëse kjo gjë bëhet zakon, atëherë koha e leximit nuk do t'ju duket më si ajo koha që nuk e gjeni dot kurrë dhe pastaj do t’ju duhet të gjeni kohë për gjëra të tjera, më pak të rëndësishme”, shkruan Bërkemeni. Po, në fund të fundit, njeriu gjen gjithmonë pak kohë për libra të mirë!

Burimi i informacionit, 27 Gusht 2019

https://www.illibraio.it