Njerëzit mendojnë se minjtë e librave janë vetmitarë e të mbyllur në vetvete. Mirëpo shkenca na thotë se kjo nuk është e vërtetë. Sipas një studimi britanik të Universitetit Kingston, duket se njerëzit që lexojnë më shumë, sidomos letërsi artistike, dinë të sillen më mirë në shoqëri dhe i kuptojnë më mirë të tjerët.

Përgjithësisht mendohet që më të shoqërueshëm janë ata që shohin emisione televizive, mirëpo studimi nxori në pah se ata që lexonin libra, ishin më të ndjeshëm ndaj të tjerëve, ndërsa adhuruesit e televizionit shfaqnin shenja të sjelljes antishoqërore.

Po sipas këtij studimi, te njerëzit që lexonin letërsi, edhe gjinitë e ndryshme letrare ndikonin në mënyra të ndryshme. Kështu, ata që lexonin komedi, përshtateshin më me lehtësi, kurse ata që pëlqenin romancën dhe veprat dramatike, e vinin veten më lehtë në vendin e tjetrit dhe i mirëkuptonin këndvështrimet e tij. Nga studimi lind vetëm një pyetje: A i ndihmon leximi njerëzit të bëhen më të ndjeshëm apo njerëzit e ndjeshëm lexojnë më shumë letërsi?

Burimi: Peace Quarters / Shkurt 2019