Sipas një anketimi të BBC-së, historia më madhështore që është rrëfyer ndonjëherë, është “Odiseja” e Homerit. Në 12.000 vargjet e poemës shpalosen aventurat e heroit grek, pas përfundimit të Luftës së Trojës, ngatërruar mes Zotash e përbindëshash. Nuk është historia e një njeriu që niset aventurave në kërkim të floririt a të ndonjë toke të re, por e një bashkëshorti, që përpiqet të kthehet në shtëpinë e tij në Itakë pas një lufte dhjetëvjeçare. Kuptohet që kjo është arsyeja pse poema ka të tillë jehonë edhe në ditët e sotme, më shumë se 2700 vjet pasi është shkruar. Ajo është sa madhështore, aq edhe intime. Edhe pse ka shtrirje të gjerë gjeografike, autori u ka kushtuar vëmendje të veçantë detajeve. Gjatë rrëfimit, te “Odiseja” shtrohet pyetja: Ç’do të thotë të mbetesh burrë, kur del nga rrethanat që të kanë formësuar karakterin? Heroi kryesor është bashkëshorti që ndodhet larg së shoqes, babai që nuk e ka parë dot të birin tek rritej, luftëtari që i ka përfunduar lufta, mbreti që rron larg mbretërisë së tij, prijësi që humb të gjithë ata që e ndjekin, kurorë shkelësi për hir të tekave të Perëndeshave dhe biri, të cilit nëna i ikën nga kjo jetë zemërthyer, se e di të vdekur. Ai është edhe udhëtar, pirat, aventurier e refugjat. “Odiseja” është një poemë epike me detaje e fabula të ndërthurura aq të thella, sa çdo lexues gjen diçka në të. Ajo do të vazhdojë të mbetet e gjitha e vërtetë edhe pas 2700 vjetësh të tjerë.   

Burimi: BBC / Prill 2019